Форум » » Съ Днемъ Рожденія, Ваше Императорское Величество! » Ответить
Съ Днемъ Рожденія, Ваше Императорское Величество!
Юрий Дмитриевич: 19-го Мая 1868 года - День Рожденія Святаго Царя-Страстотерпца Николая Александровича Романова. Сердечно поздравляю всѣхъ съ Праздникомъ! Святый Царю Страстотерпче Николаѣ, моли Бога о насъ! Святiи Царственнiи Мученицы, молите Бога о насъ!
Ответов - 2
Святополкъ: Съ Праздникомъ Васъ, Православные!
Святополкъ: Акаѳистъ Святымъ Царственнымъ Страстотерпцамъ Кондакъ 1 Избраніи царственнiи страстотерпцы седмочисленнiи, Христу Богу, яко агнцы непорочнiи, въ жертву принесшiися. Земли Россійскія хранитилiе и молитвенницы, яко стяжавшiи отъ Царя царствующихъ и Господа господствующихъ благодать молитися за ны, отъ всякихъ насъ бѣдъ и напастей свободите, да благодарственно восхваляемъ васъ: Радуйтеся, царственнiи страстотерпцы, Руси Святыя похвало и украшеніе. Икосъ 1 Ангели Божій, хранителiе душъ и тѣлесъ вашихъ, наставляху и укрепляху васъ, святiи, не токмо во страданiихъ, но присно утверждаху во истиннемъ пути, да будетъ житіе ваше праведнымъ къ увѣнчанію мученическому, темже прославляемъ васъ сице: Радуйтеся, страхъ Божій въ сердце, яко основаніе, положившiи; радуйтеся, премудрость Божію издетска возлюбившiи. Радуйтеся, не яко наемницы, но сыны Божіи Господу угодившiи; радуйтеся, яко и званія друзей Божіихъ удостоившiися. Радуйтеся, христіанскаго благочестія твердое правило; радуйтеся, Православныя вѣры крѣпкое исповѣданіе. Радуйтеся, царствующаго рода Россійскаго утвержденіе; радуйтеся, страждущаго народа нашего утѣшеніе. Радуйтеся, царственнiи страстотерпцы, Руси Святыя похвало и украшеніе. Кондакъ 2 Видящи Пресвятая Дѣва скорбь, стенаніе и плачъ народа нашего, егда смутная времена насташа, умилосердися и яви милость Свою чрезъ икону, именуемую Феодоровская, во избраніи законнаго отъ Бога Михаила царя, да будетъ икона та покровъ и защита ему и всему новоизбранному царскому роду и во утвержденіе державы Россійскія. Сего ради мы благодарственно вопіемъ Богу: Аллилуiа! Икосъ 2 Разумеша людіе Российстiи, яко Господь избраніемъ на царство Россійское новаго рода отъ благочестиваго корене утиши нестроенiя, смуты, мятежи въ Земли нашей и миръ и благостояніе Церкви Своей дарова. Мы же, къ вамъ, царственнiи страстотерпцы, яко рождиемъ отъ вѣтви сѣя благословенныя, со умиленіемъ вопіемъ: Радуйтеся, вѣнецъ и похвало рода царскаго и священнаго; радуйтеся, корене благочестиваго преславныя отрасли. Радуйтеся, Россійскаго Патріарха Филарета и великія старицы инокини Марѳы святое наслѣдіе; радуйтеся, благочестія двоицы сѣя преславное исполненіе. Радуйтеся, священнаго праотца вашего любовь и ревность о Православномъ отечествѣ наследовавшiи; радуйтеся, преподобныя праматере смиреніе и упованіе на помощь Божію воспрiемшiи. Радуйтеся, прадеднаго благословенія Божія Матере удостоившiися; радуйтеся, благословеніе сіе, яко залогъ, даже до смерти мученическія соблюдшiи. Радуйтеся, царственнiи страстотерпцы, Руси Святыя похвало и украшеніе. Кондакъ 3 Сила Божія и промышленіе Всевышняго явися въ рожденіи твоемъ, царственный страстотерпче Николаѣ, великому бо чудотворцу Міръ Ликійскому уподобився, новый заступникъ Россійскія Земли показался еси, многія же скорби и болѣзни, яко праведный Іовъ, въ житіи претерпѣвъ, нынѣ съ лики мученическими наслаждаешися райскаго блаженства, воспѣвая Богу: Аллилуiа! Икосъ 3 Имѣя сугубыя заступники и покровители, Іова праведнаго и Николая святителя, въ рожденіи твоемъ, державный страстотерпче, добродѣтели тѣхъ въ сердце стяжалъ еси. Мы же, благодаряще Бога и дивящеся Его всесильному промышленію о тебѣ, благоговейне воспѣваемъ сице: Радуйся, въ молитвахъ святителя Міръ Ликійскихъ присно призываяй; радуйся, того помощію Россійскую Державу праведно окормляяй. Радуйся, сердечнымъ попеченіемъ о людехъ тому уподобивыйся; радуйся, милосердіе во всѣхъ дѣлехъ, якоже оный, явивый. Радуйся, истину и вѣрность во всемъ житіи твоемъ, яко Іовъ, сохранивый; радуйся, кротость и незлобіе того въ сердце твоемъ стяжавый. Радуйся, въ тяжкихъ бѣдахъ, якоже многострадальный праведникъ, устнама предъ Богомъ ничимже согрешивый; радуйся, вся приключшаяся тебѣ благодарно со смиреніемъ терпевый. Радуйтеся, царственнiи страстотерпцы, Руси Святыя похвало и украшеніе. Кондакъ 4 Бурю смущенія, воздвизаемую отъ человѣкъ злочестивыхъ въ странѣ нашей, твой державный родитель рукою крѣпкою укроти и царство Россійское цѣло и нерушимо тебѣ въ наслѣдіе даде. Обаче завистію дiаволею Земля наша въ вящее искушеніе ввержена бысть и тя, угодниче Божій, отверже. Ты же, святче, провидя сіе попущеніе Божіе за грѣхи людскія, усердно Богу воспѣвалъ еси: Аллилуiа! Икосъ 4 Cнаставления лыша державныхъ родителей твоихъ и праведнаго Іоанна Кронштадтскаго, како подобаетъ православному государю быти, положилъ еси въ сердце, царственный страстотерпче Николаѣ, Православіе, державу и народъ Россійскій во единствѣ блюсти. Сего ради мы воспѣваемъ тебѣ тако: Радуйся, благочестивыхъ родителей отрадо и утѣшеніе; радуйся, мудрыхъ наставленій исполненіе. Радуйся, издетска вѣрѣ и благочестію наученный, радуйся, въ любви къ Богу и Церкви укорененный; Радуйся, въ вѣрности ко отечеству и народу своему воспитанный; радуйся, душу свою за него положити готовый. Радуйся, царскій вѣнецъ отъ Бога съ благоговѣніемъ воспрiемый; радуйся, дара Духа Святаго на царское служеніе въ помазаніи мѵромъ удостоенный. Радуйтеся, царственнiи страстотерпцы, Руси Святыя похвало и украшеніе. Кондакъ 5 Богосветлая звѣзда во мраце скорбей благовѣрнѣй супружницѣ твоей явился еси, царственный страстотерпче Николаѣ, указуя и возглавляя путь ея, якоже повеле Господь. Мы же, прославляюще вашъ благословенный святый брачный союзъ во Христѣ, хвалу Богу воздаемъ, поюще: Аллилуiа! Икосъ 5 Видя царственный страстотерпецъ, яко зарю солнечную, яко Ангела свѣтла, юницу Александру, избра ю себѣ въ благовѣрную супружницу, православную царицу и матерь народа Россійскаго. Мы же, ведуще усердное служеніе ея, воспѣваемъ сице: Радуйся, именитаго рода благочестивое прозябенiе; радуйся, отъ лютерскiя вѣры къ Православію образѣ спасительнаго прехожденiя. Радуйся, всѣмъ сердцемъ молитву возлюбившая; радуйся, о службѣ Божіей сердечно ревновавшая. Радуйся, словомъ Божіимъ и писаніемъ святыхъ отецъ себѣ назидавшая; радуйся, посты церковныя благоговѣйно соблюдавшая. Радуйся, русское благочестіе достойне воспрiемшая; радуйся, истиныя жизни во Христе пріобщившаяся. Радуйтеся, царственнiи страстотерпцы, Руси Святыя похвало и украшеніе. Кондакъ 6 Проповедницы чистоты святаго брака во образъ единства Христа и Церкве явилися есте, благовернiи Николаѣ и Александро. Вы бо, благодать сего великаго таинства достойно воспрiемше, даже до мученическія кончины Христу и другъ другу вѣрность сохранили есте, присно воспевающе Богу: Аллилуiа! Икосъ 6 Возсiя въ странѣ Россiйстей, яко прекрасная свѣтила, благовѣрная царственная чета Николай и Александра, истинная домашняя церковь, супрузи, связуемiи союзомъ любве о Господѣ. Мы же, прославляюще образъ ихъ супружескаго цѣломудрія и добронравнаго житія въ мірѣ семъ развращеннемъ и грѣшнемъ, со благоговѣніемъ воспѣваемъ сице: Радуйтеся, всѣмъ сердцемъ Бога взыскавшiи; радуйтеся, въ путехъ Господнихъ непорочно ходившiи. Радуйтеся, чето честная, свыше избранная; радуйтеся, двоицѣ святая, славою и честію отъ Бога увѣнчанная. Радуйтеся, цѣломудріе супружеское многочадiемъ прославившiи; радуйтеся, чада своя, яко новосажденiя масличная, окрестъ трапезы Небесныя собравшiи. Радуйтеся, въ супружествѣ благочестно жити научающiи; радуйтеся, міръ Христовъ онымъ милостивно низпосылающiи. Радуйтеся, царственнiи страстотерпцы, Руси Святыя похвало и украшеніе. Кондакъ 7 Хотяще свой домъ благочестно устроити, заповѣди Господни и бракъ честенъ добрѣ соблюли есте, благовернiи супрузи Николаѣ и Александро. Темже, многочадiемъ свою домашнюю церковь украсивше и дщери своя, яко мудрыя евангельскія дѣвы, воспитавше, въ невѣсты Христу уготовали есте. Съ нимиже нынѣ вкупѣ воспѣваете Богу: Аллилуiа! Икосъ 7 Новую милость яви Господь народу русскому, добронравныя и цѣломудренныя дщери благочестивыя царственныя четы: Ольгу, Татiану, Марію и Анастасію. Тыя бо, женамъ мѵроносицамъ подражающыя и елей милосердія въ душахъ хранящыя, болящимъ и страждущимъ усердно послужиша и мученическую смерть за Христа прiяша. Сего ради прославляемъ ихъ сице: Радуйтеся, дщери царевы, обѣтованій Божіихъ сподобльшiяся; радуйтеся, заповѣдь Божію о почитаніи родителей соблюдшія. Радуйтеся, царскаго достоинства не посрамившія; радуйтеся, стихіями міра сего не порабощенныя. Радуйтеся, людемъ, сущымъ въ бѣдахъ и скорбехъ, помогающія; радуйтеся, за враговъ своихъ усердно молящіяся. Радуйтеся, агницы непорочныя, въ жертву Богу себѣ принесшія; радуйтеся, невѣсты Христовы, въ чертозехъ Жениха Небеснаго пребывающія. Радуйтеся, царственнiи страстотерпцы, Руси Святыя похвало и украшеніе. Кондакъ 8 Странно и чудно бысть рожденіе твое, святый царевичу Алексiе. Плодъ бо благославенъ молитвъ Саровскаго чудотворца и чаемый царственный наслѣдникъ родителей бывъ, слава, надежда и упованіе явился еси всѣмъ концемъ Земли нашея. Сего ради людіе Россiйстiи съ радостію благодарственно воспеша Богу: Аллилуiа! Икосъ 8 Къ вышнимъ душею дѣтскою, яко Ангелъ, устремляяся, святый царевичу Алексiе, родители, сестры, сродники и ближняя искренне возлюбилъ еси и, яко агнецъ незлобивый, руками злочестивыхъ убiенъ, новый отрокъ страстотерпецъ явился еси. Сего ради восхваляемъ тя сице: Радуйся, отроча, отъ утробы матернiя Богомъ предъизбранное; радуйся, чадо, усердными родительскими молитвами къ чудотворцу Саровскому Россіи дарованное. Радуйся, царевичу добролюбезный и кроткій, милосердіе въ сердце стяжавый; радуйся, страдальче, многія скорби и недуги измлада безропотно терпевый. Радуйся, наследниче Россійскаго престола, отъ беззаконныхъ убіенный; радуйся, наслѣдникомъ Царствія Небеснаго отъ Бога явленный. Радуйся, агнче непорочный, яко праведный Авель, умерщвленный; радуйся, страстотерпче, къ лику святыхъ отроковъ, яко Димитрій царевичъ, причтенный. Радуйтеся, царственнiи страстотерпцы, Руси Святыя похвало и украшеніе. Кондакъ 9 Всякъ благочестивый удивляется о тебѣ, царю Николаѣ, како ты во времена, егда въ земли нашей истина умалися и подавляшеся неправдою, пребылъ еси сынъ вѣрный Святыя Церкве, защитникъ и хранитель Православныя вѣры, таже исповѣдникъ и мученикъ Христовъ. Сего ради Церковь Русская, ликующи, Богу вопіетъ: Аллилуiа! Икосъ 9 Ветiи зловещаннiи тщашася оболгати тя лжою и лестію, и истребити память о тебѣ, царственный помазанниче Божій Николаѣ, кровавымъ тя нарицающе, обаче погибе память тѣхъ съ шумомъ. Къ тебѣ же, воистину кровь свою за Христа пролiявшему, Россійскій народъ съ покаяніемъ вопіетъ: Радуйся, прославленія праведниковъ и угодниковъ Божіихъ добрый рачителю; радуйся, Кронштадтскаго пастыря и Саровскаго чудотворца усердный почитателю. Радуйся, православныхъ храмовъ боголюбивый созидателю; радуйся, иноческихъ обителей и монашества благочестивый покровителю. Радуйся, Святыя Земли и Горы Аѳонскія щедрый благотворителю; радуйся, духовныхъ вертоградовъ мудрый попечителю. Радуйся, возрожденія соборнаго начала Церкве Русскія устроителю; радуйся, возстановленія всероссійскаго патріаршаго престола ревнителю. Радуйтеся, царственнiи страстотерпцы, Руси Святыя похвало и украшеніе. Кондакъ 10 Спасти и сохранити хотя православное царство Россійское цѣло и нерушимо, святый благовѣрный царю Николаѣ и, видя ослѣпленіе народа твоего, отрекшагося отъ Царя Небеснаго, такожде и земнаго, въ душевныхъ мукахъ, оставилъ еси престолъ земный. Темже, уповая на милость Господа и себѣ въ руцѣ Божіи предавъ, непоколебимъ въ вѣрѣ и благочестіи пребылъ еси, воспѣвая: Аллилуiа! Икосъ 10 Стѣна и огражденіе былъ еси всѣмъ православнымъ людемъ Россійскимъ, святый благовѣрный царю Николаѣ, избавляя ихъ отъ нашествія иноплеменниковъ и братоубійственныя брани и миръ, елико возможно, тщался еси имети со всѣми. Мы же, ведуще сіе, благодарне тебѣ воспѣваемъ: Радуйся, пророчески призвавый народы мечи на орала перековати; радуйся, евангельски сподобивыйся блаженства миротворцевъ стяжати. Радуйся, странъ словенскихъ надежный защитителю; радуйся, народовъ державы Россійскія сугубый попечителю. Радуйся, державы Россійскія мудрый правителю; радуйся, во бранехъ искусный и доблiй воителю. Радуйся, дерзостныхъ дѣлъ служителей беззаконія тайнаго губителю; радуйся, возставшихъ на Бога и на тя, яко помазанника Его, посрамителю. Радуйтеся, царственнiи страстотерпцы, Руси Святыя похвало и украшеніе. Кондакъ 11 Пѣнія всякаго достойна память ваша, святiи царственнiи страстотерпцы. Вы бо, образъ исповѣдничества и ревности по Бозе вѣрнымъ людемъ показавше, заповѣдаете не мстити злодеющимъ, яко любы токмо побѣдитъ зло, паче же прощати гонящимъ и молитву творити за нихъ, благодарственно поюще Богу: Аллилуiа! Икосъ 11 Свѣтоносный свѣтильникъ седмочисленный вемы васъ, святiи царственнiи мученицы, царскимъ бо путемъ шествующе, въ жертву благоугодную Агнцу Божію уготоваете себѣ и невинно смерть приясте. Темже просвѣщеніе намъ даруйте, озаряюще омраченная сердца наша, и вѣрнымъ путемъ шествовати научите, прославляющимъ васъ сице: Радуйтеся, агнцы непорочнiи, Христу Пастырю последовавшiи; радуйтеся, образъ исповѣдничества, вѣрнымъ людемъ показавшiи. Радуйтеся, отъ юности совѣсть чисту соблюдшiи; радуйтеся, жизни конецъ достойно восприемшiи. Радуйтеся, седмочисленнiи страстотерпцы, во единомъ дусе Богу представшiи; радуйтеся, кровію мученическою Церковь Христову украсившiи. Радуйтеся, новомученицы, за Русь Святую отъ безбожныхъ пострадавшiи; радуйтеся, ликъ страстотерпцевъ Россійскихъ добле восполнившiи. Радуйтеся, царственнiи страстотерпцы, Руси Святыя похвало и украшеніе. Кондакъ 12 Благодать изрядну Богъ дарова Церкви Россiйстей, прославивъ на Небеси святыя царственныя страстотерпцы. Сего ради и мы на земли прославляемъ васъ, яко истинныя хранители и покровители страны нашея, и Богу вопіемъ: Аллилуiа! Икосъ 12 Поюще промышленіе Божіе, подвигшее сердца людей Россійскихъ прославити васъ, царственнiи страстотерпцы, на земли евангельски пожившія и за Христа отъ безбожныхъ пострадавшія и чудесы по смерти прославльшiеяся, дерзаемъ воспевати сице: Радуйтеся, яко прославленію вашему многія люди возрадовашася; радуйтеся, яко чудесы вашими сердца вѣрныхъ укрепишася. Радуйтеся, народъ Россійскій къ покаянію призывающiи; радуйтеся, отеческія завѣты исполняти насъ наставляющiи. Радуйтеся, молитвами вашими отъ междоусобія насъ избавляющiи; радуйтеся, въ мирѣ и любви со всѣми жити намъ помогающiи. Радуйтеся, яко образы ваши мѵроточенiемъ прославляются; радуйтеся, яко въ честь вашу храмы созидаются. Радуйтеся, царственнiи страстотерпцы, Руси Святыя похвало и украшеніе. Кондакъ 13 О единодушная великоiменитая седмерице, царственнiи страстотерпцы, многія скорби, поруганія, страданія душевная и смерть тѣлесную за Христа прiемшiи и вѣнцы небесными отъ Него увенчаннiи! Пріимите нынѣ отъ насъ похвальное прославленіе и сердечное покаяніе и милостивнымъ вашимъ ходатайствомъ умолите Царя Славы миръ Церкви нашей даровати, страну въ Православіи, благочестіи и единствѣ сохранити, намъ же ожесточенія сердечнаго и ослѣпленія избавитися, да сыновне Богу вопіемъ: Аллилуiа! (Этотъ кондакъ читается трижды, затѣмъ икосъ 1 и кондакъ 1). МОЛИТВА *** О, святый страстотерпче царю мучениче Николаѣ! Господь тя избра помазанника Своего, во еже милостивно и право судити людемъ твоимъ и хранителемъ Церкве Православныя быти. Сего ради со страхомъ Божіимъ царское служеніе и о душахъ попеченіе совершалъ еси. Господь же, испытуя тя, яко Іова Многострадальнаго, попусти ти поношенія, скорби горькія, измѣну, предательство, ближнихъ отчужденіе и въ душевныхъ мукахъ земнаго царства оставленіе. Вся сія ради блага Россіи, яко вѣрный сынъ ея, претерпѣвъ, и, яко истинный рабъ Христовъ, мученическую кончину пріемъ, Небеснаго Царства достиглъ еси, идеже наслаждаешися Вышнія славы у Престола всѣхъ Царя, купно со святою супружницею твоею царицею Александрою и царственными чады Алексіемъ, Ольгою, Татiаною, Маріею и Анастасіею. Нынѣ, имѣя дерзновеніе велiе у Христа Царя, моли, да проститъ Господь грѣхъ отступленія народа нашего и подастъ грѣховъ прощеніе и на всякую добродѣтель наставитъ насъ, да стяжимъ смиреніе, кротость и любовь и сподобимся Небеснаго Царствія, идеже купно съ тобою и всѣми святыми новомученики и исповѣдники Россійскими прославимъ Отца и Сына и Святаго Духа, нынѣ и присно и во вѣки вѣковъ. Аминь. *** Текстъ акаѳиста святымъ Царственнымъ страстотерпцамъ утвержденъ Богослужебной комиссіей и Священнымъ Сѵнодомъ Русской Православной Церкви на засѣданіи Св. Сѵнода отъ 17 іюля 2002 года. © журналъ "Церковный вѣстникъ", 2002.
полная версия страницы